Monte Bello Series: Sebastian - Mananatili Kang Akin

Puerto del Cielo

"Damnit, Andrea!" ang galit na galit na sigaw ni Sebastian sa kausap sa telepono. "Gusto mo bang igapos ko pa ang mga paa mo para lang maiuwi ka dito!?" nagngangalit ang mga bagang na wika niya.

Hindi sumagot ang nasa kabilang linya.

Marahas na pinaraanan ni Sebastian ng kanyang mga daliri ang malagong buhok.

"This is my last ultimatum Andrea," aniya sa nag-iigting na tinig. "I am giving you three months... three months Andrea. Naiintindihan mo? At kapag hindi ka pa umuwi dito, pasensyahan tayo... dahil kung kinakailangang ikadena kita, gagawin ko, maibalik ka lang dito!"

At pagkasabi noon ay mariin niyang diniinan ang end button ng kanyang telepono. Halos madurog na iyon sa kamay niya sa higpit ng kanyang pagkakahawak.

Paikot-ikot siya sa loob ng library habang nag-iisip ng may biglang kumatok sa pintuan noon. Salubong ang kanyang mga kilay na hinirap ang kung sinumang iyon.

Nakita niyang nakatayo doon ang matandang mayordoma nila na si Manang Andeng. Pinayapa niya muna ang sarili bago ito pinatuloy.

"Ano ho iyon, Manang?" tanong niya rito.

Tila naman hindi mapakali ang matanda. Lalo pa itong kinabahan sa nakikitang itsura niya.

Mabagal ang mga hakbang nito ng tumuloy sa loob. "Señorito..." anito sa nag-aalangang tinig. Hindi ito makatingin ng deretso sa kanya.

"Say it Manang," wika niya sa naiinip na tinig at hinarap ang kanyang mga gamit sa ibabaw ng mesa. "Marami pa akong gagawin ngayon sa koprahan. Wala akong panahong mag-aksaya ng oras dito."

Pinasadahan ng kanyang mga mata ang mga papeles na dadalhin. Sahuran ngayon ng kanilang mga tauhan, kaya't alam niyang marami ang naghihintay sa kanya sa koprahan.

Ang Hacienda Monte Bello ay ekta-ektaryang lupain na minana ng namayapa niyang ama na si Don Federico Monte Bello mula pa sa kanunu-nunuan nito. Matatagpuan ito sa Puerto del Cielo, isang lugar sa timog na bahagi ng Luzon.

Kilala ang hacienda nila na nagungunang exporter ng kopra sa bansa. Bukod pa dito, may iba pa silang produkto na dinadala rin sa iba't ibang bansa gaya ng saging, mais, tubo at kung ano-ano pa.

Apat silang magkakapatid at siya ang pinaka-panganay. Mula ng mamatay ang kanilang papa, naatang ng lahat sa kanyang mga balikat ang mga tungkulin dito sa hacienda.

His brother Antonio was in-charge on their businesses in Manila, while his two sisters Aurora and Andie, were roaming around the world.

He devoted his whole life here, kaya't maging ang sariling buhay ay hindi na niya maasikaso. At ngayon nga ay marami siyang trabahong kailangang asikasuhin sa koprahan at kinakailangang matutukan niya agad iyon.

"Eh... Señorito nawawala po si Bella," anas ni Manang Andeng sa nag-aalalang tinig.

Marahas siyang napabaling dito. "Papaano hong nangyari iyon? Nasaan ho ang yaya niya?" sunod-sunod na tanong niya dito.

"Eh, 'yun na nga ho Señorito... pati ho 'yung yaya nawawala," mahinang pa ring sabi nito.

"Ano ho?!" ang malakas niyang wika.

Parang kulog iyon na halos buong kabahayan nila ay nagulantang sa lakas ng pagkakasabi niyang iyon.